mi toki pona

mi kama sona e toki pona lon tenpo sike nanpa 2017. tenpo ni la kulupu pi toki pona li lili. tenpo ni la toki Epelanto li toki pali suli wan taso. lili kulupu pi toki pona li sama toki pali ante ale.

jan li toki mute e ni: "toki pona li lili mute la sina ken kama sona e ona kepeken tenpo lili a!". pilin pi jan mute la ni li lon mute ala. taso kulupu pi toki pona li kama suli mute tan toki ni taso. ante la jan li toki e ni tawa jan: "kama sona pi toki pona li pali suli mute a!!!"... la jan li wile ala kama sona e toki pona.

tenpo mute la mi toki pona. taso mute la toki ni li tawa mi taso. pilin mi la ken kute mi pi toki pona li pona mute ala. mute la mi lukin anu kute e toki pona li alasa sona e wile toki ona, taso mi ken ala pali pona e ni. mute la mi lon ala kulupu pi toki pona, la mi kute mute ala e toki pona.

pilin mi la kulupu pi toki pona li suli ike li nasa tawa mi. jan mute li sona ala toki tawa jan ante lon nasin pona pi kon utala ala. kulupu pi toki pona li kama e jan mute pi kon ni. kin la mute la jan li kepeken ala e toki pona, li toki utala lon ijo pi toki pona kepeken toki Inli. anu toki utala lon ijo nasa ante kepeken toki Inli. tan ni la mute la mi lon ala kulupu pi toki pona.

pilin mi la: toki pona li lili li musi. kulupu pi toki pona li suli li nasa.